Programa de apoio sanitario na emerxencia provocada polo COVID 19 en España

A Fundación Amancio Ortega vén de pór en marcha un proceso de compra de material sanitario para a loita contra o COVID-19 e a súa inmediata doazón aos centros sanitarios do noso país. A adquisición de material realízase de acordo coas indicacións técnico-sanitarias das autoridades españolas. O material ponse a disposición no momento da súa recepción en España.

O obxectivo desta acción é completar as doazóns de equipos dispoñibles para os coidados necesarios a pacientes e, simultaneamente, incrementar a capacidade de protección dos propios profesionais sanitarios fronte á exposición ao contaxio. O material adquirido consiste principalmente en respiradores para as unidades de coidados intensivos, máscaras filtrantes e outros equipos de protección, kits de detección do coronavirus e outros equipamentos, como camas hospitalarias.